Warar

Farmaajo oo mooshin ka badbaaday, kadibna loo dhaariyey xildhibaannimo

Muqdisho (Caasimada Online) – Xildhibaannada Golaha Shacabka Baarlamaanka Soomaaliya ayaa maanta kulan muhiim ah ku yeeshay xaruntooda magaalada Muqdisho, kaas oo lagu dhaariyey madaxweynihii 9-aad ee dalka, Mudane Maxamed Cabdullahi Maxamed (Farmaajo) oo noqonaya xildhibaan abadiya ah, sida uu qabo dastuurka KMG ah.

Ugu horreyn waxaa kulanka hareeyey dood ay keeneen xildhibaano uu ku jiro siyaasiga Cabdiraxmaan Cabdishakuur oo ka soo horjeeday in la dhaariyo Farmaajo, isaga oo ku eedeeyey inuu xadgudub geystay muddadii uu xafiiska joogay ee uu ahaa madaxweynaha.

“Taariikhdaan waa hareysaa waxaan rabaa in hadda kuwa xukunka qabsaday falka uu sameeyey in uusan sameyn oo qof idinka mid ah gurigiisa loogu dhicin,” ayuu yiri Cabdiraxmaan Cabdishakuur oo hadal ka jeediyey kulanka Baaralamaanka Soomaaliya.

Waxa kale oo uu intaasi ku sii daray in xittaa uu ka waayey wax raalli-gein ah, maadaama inta badan xubnihii isaga la soo shaqeeyey ay bixiyeen garowshiyo, una tegeen.

““Madaxweynihii hore Farmaajo kama haayo wixii dhacay mid dhaqameed iyo mid dowladeed. Dhammaan intii ku lug laheyd falkii la’igu soo weeraray waa ii yimaadeen, waana i raalli-geliyeen” ayuu hadalkiisa sii raaciyey xildhibaanka.

Intaas kadib guddoomiye Sheekh Aadan Madoobe ayaa sheegay in cod la gelinayo wax ka beddelka ajendaha maanta, gaar ahaan dhaarinta madaxweyne Farmaajo, kadib markii ay mooshin ka keeneen 11 xildhibaan oo ka tirsan xubnaha Golaha Shacabka Soomaaliya.

Xildhibaannada ayaa cod gacan-taag ah, kadib ogolaaday in la dhaariyo Maxamed Farmaajo oo isla goobta loogu qabtay dhaarta, wuxuuna sidaas ku noqday xildhibaan abadiya ah.

Farmaajo waxaa ka horreeyey madaxweyne Xasan Sheekh Maxamuud oo isna sanadkii 2017-kii loo dhaariyey xildhibaan aan dhicin oo ka tirsan Baarlamaanka Soomaaliya.

Si kastaba qodobka 64-aad farqaddiisa 4-aad ee Dastuurka KMG ayaa wuxuu dhigayaa in qof kasta oo noqda Madaxweynaha JFS marka uu xilka banneeyo inuu noqonayo xildhibaan Golaha Shacabka inta uu nool yahay, haddii aan xil ka qaadis lagu sameyn, ayada oona muddadii xil heyntiisa dhammaan, si waafaqsan qodobkan ka midka ah Dastuurka KMG ah.

Related posts

CC Shakuur oo Farmaajo ku haysta muxuusan ula kulmin Trump, Xi iyo May?

Asad Cabdullahi Mataan

Xog: Kursigii ugu qaalisanaa Aqalka Sare iyo qarashka ku baxay

Asad Cabdullahi Mataan

R/W Rooble oo magacaabay guddiyada doorashada iyo xallinta khilafaadka ee heer federaal + Magacyada

Asad Cabdullahi Mataan